Kryetari aktual i Komunës së Junikut, Ruzhdi Shehu, ka bërë të ditur përmes një postimi në rrjetin social Facebook se është nominuar nga Dega e Lidhjes Demokratike të Kosovës (LDK) në Junik për një mandat të dytë si kandidat për kryetar komune.
Shehu ka theksuar se ky do të jetë mandati i tij i fundit në këtë detyrë.
“Me nder dhe përgjegjësi të lartë ju njoftoj se Dega e LDK-së në Junik më ka nominuar edhe për një mandat si kandidat për Kryetar të Komunës. Megjithatë, zgjedhjet e ardhshme lokale do të jenë zgjedhjet e fundit në të cilat unë do të kandidoj”, ka shkruar Shehu.
Ai vlerësoi përkrahjen e vazhdueshme të qytetarëve dhe strukturave të partisë si një shtysë për angazhimin e mëtejshëm.
“LDK në Junik është më e konsoliduar se kurrë më parë dhe besoj fuqishëm se me mbështetjen tuaj dhe punën tonë të përbashkët, në zgjedhjet e ardhshme do të triumfojmë pa balotazh”, ka shkruar ai.
Shehu më tej ka shtuar se gjatë dy mandateve të tij janë realizuar shumë projekte që kanë ndikuar drejtpërdrejt në jetën e qytetarëve, dhe paralajmëroi projekte të reja në vazhdimësi për zhvillimin e qëndrueshëm të komunës.
Në fund, Shehu ka falënderuar qytetarët dhe mërgatën junikase për mbështetjen e tyre të vazhdueshme në rrugëtimin për një Junik më të zhvilluar.
