Këngëtari Ledri Vula dhe veterani i luftës, Bekim Shyti, do t’i drejtohen sonte qytetarëve në protestën “Jo në emrin tim”, e cila do të mbahet në sheshin “Skënderbeu” në Prishtinë.

Sipas programit të protestës, Ledri Vula do të mbajë një fjalim para qytetarëve, ndërsa Bekim Shyti do të paraqitet me “Betimin e ushtarit” dhe do të mbajë gjithashtu një fjalim.

Gjatë mbrëmjes pritet t’u drejtohet qytetarëve edhe organizatori i protestës, Çlirim Haziri.

Në program janë përfshirë edhe Vlora Jashari dhe Erdi Mirena.

Protesta është paralajmëruar të nisë në orën 21:00 në sheshin “Skënderbeu”, ndërsa organizatorët kanë paralajmëruar vazhdimin e mobilizimit qytetar pas aktgjykimit të Dhomave të Specializuara të Kosovës në Hagë ndaj ish-krerëve të UÇK-së.