Ministri i Shëndetësisë, Rifat Latifi, ka miratuar rekomandimin e Komitetit për imunizmin e popullatës, me të cilin do të lejohet doza e katërt e vaksinës kundër Covid-19 për disa kategori të caktuara.
Pas këtij miratimi, do të lejohet vaksinimi me dozën e katërt për të gjithë personat e grupmoshës mbi 50 vjeç, dhe të paktën 4 muaj nga marrja e dozës së tretë.
Gjithashtu, personat me sëmundje kronike dhe imunitet të dobësuar të moshës mbi 5 vjeç, të paktën 4 muaj pas marrjes së dozës së tretë, ndërsa për profesionistët shëndetësorë, pa dallim moshe.
“Lejohet vaksinimi me dozën e katërt për të gjithë personat e grupmoshës mbi 50-vjeçare (të paktën 4 muaj pas marrjes së dozës së tretë), personat me sëmundje kronike dhe imunitet të dobësuar të moshës mbi 5-vjeçare (të paktën 4 muaj pas marrjes së dozës së tretë) si dhe për profesionistët shëndetësorë, pa dallim moshe” thuhet në njoftimin e Ministrisë së Shëndetësisë.
