Pal Lekaj nga Aleanca për Ardhmërinë e Kosovës, në një intervistë në emisionin “FIVE” në RTV Dukagjini, ka folur për zhvillimet e fundit politike në vend.

Lekaj ka deklaruar se Kosova aktualisht po përballet me një vakum institucional.

Duke komentuar pritjet nga Gjykata Kushtetuese e Kosovës lidhur me rastin e shpërndarjes së Kuvendit nga Presidentja Vjosa Osmani, ai tha se masa e përkohshme e vendosur deri më 31 mars nënkupton se gjatë kësaj jave mund të merret edhe aktvendimi përfundimtar.

Ai shtoi se Lëvizja Vetëvendosje ka vepruar me vonesë për arsye politike, duke mos i ndërmarrë procedurat në kohë.

“Sikur z. Kurti të ishte i interesuar për krijimin e institucioneve, do të kishte vepruar me kohë”, ka deklaruar Lekaj.