Një tjetër polic i Kosovës ka pësuar lëndime, si pasojë e sulmeve në Banjskë, të dielën e 24 shtatorit.
Kështu ka konfirmuar Policia e Kosovës përmes një komunikate për media, teksa thekson se lëndimet janë kryesisht të lehta.
“Si pasojë e sulmeve një zyrtar policor i PK-së ka pësuar lëndime kryesisht të lehta”, thuhet në komunikatë.
Policia e Kosovës ka konfirmuar vrasjen e tre sulmuesve në veri, arrestimin e një sulmuesi dhe katër të tjerëve të dyshuar.
Në një komunikatë për media, policia thotë se në zonën e fshatit Banjska situata e sigurisë vazhdon të qëndrojë e tensionuar, po ashtu, sulmet me armë zjarri ndaj njësiteve policore po vazhdojnë në intensitet të njëjtë, varësisht nga lëvizjet e grupeve kriminale.
“Informacionet zyrtare të deritanishme konfirmojnë vrasjen e tre sulmuesve, arrestimin e një sulmuesi, arrestimin e katër personave të dyshuar të cilët janë hasur nën posedim të radiolidhjeve, si dhe identifikimin e një sasie të konsiderueshme të armeve, municionit dhe pajisjeve të ndryshme”, thuhet në komunikatë.
Policia konfirmon vrasjen e tre sulmuesve dhe një të arrestuari