Kryeministri në detyrë, Albin Kurti ka vizituar sot Panairin e Librit në Prishtinë.

Kurti në një postim në Facebook shkruan se libri është mjeti kryesor i një shoqërie të hapur, për një mendje të hapur sepse libri të sjell lirinë shpirtërore dhe atë mendore.

“Në moton ‘Inteligjenca rrjedh nga libri’ përmbledhet thelbi i këtij panairi: libri si burim i dijes, si formësues i vetëdijes dhe si mjet që i jep kuptim lirisë sonë mendore e shpirtërore. Në epokën e teknologjisë së avancuar, krijimtaria e njeriut, e mishëruar në libër, mbetet kulmi i mendimit dhe ndjeshmërisë që inteligjenca artificiale mundet vetëm ta lakmojë,” tha Kurti.

Ai u shpreh se marrëdhënia me librin është një nga përvojat më të thella njerëzore, që formëson karakterin, kultivon mendimin kritik dhe ndihmon ndërtimin e një shoqërie të hapur.

Në këtë edicion të panairit, janë paraqitur rreth 2,000 tituj të rinj dhe rreth 6,000 tituj nga vitet e fundit, të sjellë nga rreth 100 botues nga Kosova, Shqipëria, Maqedonia e Veriut dhe diaspora shqiptare.

Kurti ftoi të rinjtë dhe të rejat të vizitojnë panairin dhe të përqafojnë librin si një udhërrëfyes në rrugën drejt dijes dhe emancipimit.