Samiti i liderëve të vendeve të Bashkimit Evropian, ka publikuar tekstin e konkluzioneve të miratuara, ku përfshin një paragraf të veçantë për marrëdhëniet ndërmjet Kosovës dhe Serbisë.
KE-ja ka dënuar incidentet e fundit të dhunshme në veri të Kosovës dhe ka bërë thirrje për një de-përshkallëzim të menjëhershëm të situatës.
Këshilli gjithashtu ka inkurajuar palët të krijojnë kushtet për zgjedhje të parakohshme në katër komunat në veri të Kosovës dhe ka paralajmëruar se dështimi për të de-përshkallëzuar tensionet do të ketë pasoja negative.
Në kontekstin e dialogut të ndërmjetësuar nga Bashkimi Evropian, Këshilli Evropian insiston në vazhdimin e zbatimit të shpejtë të Marrëveshjes për normalizimin dhe Aneksit të Zbatimit të saj.
Në këtë drejtim, është theksuar rëndësia e themelimit të Asociacionit së Komunave me Shumicë Serbe.
“Këshilli Evropian dënon incidentet e fundit në veri të Kosovës dhe bën thirrje për shtensionim të menjëhershëm të situatës, në bazë të elementeve kyçe që tashmë janë shfaqur nga Bashkimi Evropian më 3 qershor 2023”, thuhet në tekstin e publikuar nga BE-ja.
“Palët duhet të krijojnë kushte për zgjedhje të parakohshme në të gjitha katër komunat në veri të Kosovës. Dështimi në uljen e tensioneve do të ketë pasoja negative”, shtohet tutje në tekstin e konkluzioneve.
Liderët e BE-së kanë bërë përpjekje deri pas mesnate që të arrijnë pajtim për tekstin, por Hungaria dhe Polonia e kanë bllokuar miratimin e pjesës që ka të bëjë me menaxhimin e migrimit në BE.
Kujtojmë se, që nga fundi i majit, tensionet në veriun e Kosovës – të banuar me shumicë serbe – janë rritur, pasi kryetarët e rinj shqiptarë të komunave, hynë në ndërtesat komunale me asistimin e Policisë së Kosovës.
Kryetarët e rinj u kundërshtuan nga serbët lokalë, të cilët që atëherë po mbajnë protesta të vazhdueshme në tri komunat veriore në Zveçan, Leposaviq dhe Zubin Potok.
Më 29 maj, ndodhi një përleshje mes serbëve lokalë dhe pjesëtarëve të misionit paqeruajtës të NATO-s në Kosovë, KFOR.
Situata mes Kosovës dhe Serbisë është përkeqësuar më shumë edhe më 14 qershor, pas kidnapimit të tre zyrtarëve policorë të Kosovës, të cilët u liruan pas 13 ditëve nga Serbia.