Presidenti i Shqipërisë, Ilir Meta, të shtunën i ka shprehur ngushëllime familjes Nishani, për vdekjen e ish-presidentit, Bujar Nishani.
Përmes një postimi në rrjetin social në Facebook, Meta ka thënë se ish-presidenti Nishani do të kujtohet gjithnjë si një personalitet me vlera të rralla të një udhëheqësi me integritet dhe vizion.
Tutje Meta, ka shkruar se kontributi i tij për Shqipërinë dhe demokracinë do të kujtohet përherë me respekt.
“Me trishtim dhe hidhërim të thellë mora lajmin e largimit nga jeta të Presidentit Bujar Nishani”, ka shkruar Meta.
“Ngushëllimet më të ndjera për bashkëshorten Odeta, fëmijët Ersi dhe Fiona, dhe të afërmit për këtë humbje të madhe”, ka shtuar ai.
Edhe kryeministri i Shqipërisë Edi Rama ka ngushëlluar familjen Nishani për humbjen e më të dashurit të tyre, ish Presidentin Bujar Nishani.
Përmes një njoftimi në rrjetin social Facebook, Rama ka shkruar ”U prehtë në paqe! Ngushëllime familjes”.