Liderët e partive opozitare kanë përkujtuar gjenocidin dhe masakrat e Srebrenicës që ndodhën 27 vjet më parë nga forcat serbe.
Përmes një postimi në rrjetin social Twitter, Kryetari i Lidhjes Demokratike të Kosovës (LDK), Lumir Abdixhiku ka përkujtuar 8 mijë e treqind e shtatëdhjetë e dy djemtë dhe burrat e ekzekutuar nga forcat nacionaliste serbe.
OTD 27 yrs ago, #Srebrenica genocide, the darkest mark of the modern history, took place in the very heart of Europe. 8,372 boys & men were executed by Serb nationalists forces.
Executers have strong legacy in Serbia today; the genocide denier, the EU frontrunner.#NeverForget pic.twitter.com/coV25cfkQL
— Lumir Abdixhiku (@LumirAbdixhiku) July 11, 2022
Pas Abdixhikut, një tjetër përkujtim ka ardhur nga radhët e Partisë Demokratike të Kosovës, përkatësisht nga kryetari i saj, Memli Krasniqi.
“I njëjti mentalitet sistematik, i orkestruar e gjakatar serb, i ngritur mbi vdekjet e përndjekjet, me karakter të pastër gjenocidal e duke mos kursyer askënd, u realizua edhe në Kosovë më 1998-99. Fatkeqësisht, qindra kriminelë serbë që sollën shumë vdekje e shumë dhimbje në Ballkan, vazhdojnë të enden të lirë, pa marrë asnjëherë dënimin e merituar”, ka shkruar kryetari Krasniqi, në Facebook.
Ndër të tjera, ai ka përkujtuar viktimën më të re të gjenocidit që ishte vajza e familjes Muhiç, e lindur më 13 korrik 1995 dhe viktimën më të vjetër, Saha Izmirliç, e lindur më 1901.
Ramush Haradinaj, kryetari i Aleancës për Ardhmërinë e Kosovës (AAK), ka cilësuar gjenocidin në Srebenicë si njollë të pashlyer të ndërgjegjes së njerëzimit për aq kohë sa drejtësia nuk zë vendin e saj.
“Bashkëndjejmë me popullin e Bosnjës dhe e kuptojmë dhembjen e tyre!”, ka shkruar Haradinaj.
Më shumë se 8,000 burra dhe djem nga grupi etnik boshnjak u vranë në 10 ditë masakër nga forcat serbe të Bosnjës, në korrik të vitit 1995.