Seanca dëgjimore është caktuar që të mbahet më datën 1 korrik, dhe Sheshel e ka konfirmuar se me shumë gjasa do t’i përgjigjet kësaj ftese.
Ftesë të tillë ka marrë edhe ish-zyrtari i lartë i partisë së Sheshelit, Nemanja Sharoviq, i cili përmes një postimi, ka thënë se ai nuk dëshiron që ta pranojë ftesën e këtij mekanizmi, sepse nuk është shkruar në cirilik.
Sheshel ka bërë të ditur se ftesë e ngjashme u është dërguar edhe Lilana Mihajlloviqit, Ognjen Mihajlloviqit, Mirolub Ignjatoviqit, Marina Ristiqit dhe Marina Ragusit. Që të gjithë këta janë anëtarë ose ish-anëtarë të Partisë Radikale Serbe.
Ftesa për dëshmi ka të bëjë me “shkeljet e pretenduara të rregullave të Tribunalit të Hagës, sa i përket mbrojtjes së identitetit të dëshmitarëve të mbrojtur dhe dokumenteve konfidenciale”, këtë e ka konfirmuar vetë Sheshel për radioevropalire.
“I kam publikuar që të gjitha në librat e mi, mbi 50 libra. Do të publikoj të gjitha materialet e Tribunalit të Hagës nga rasti im, sepse rasti im ka përfunduar dhe ata nuk mund t’i mbajnë sekrete për 100 vjet këto informacione”, është shpreh Sheshel.
Ai ka shtuar se nuk ka rrezikuar jetën e dëshmitarëve, por ka thënë se do të vazhdojë të nxjerrë këto materiale.
Nga Mekanizmi Ndërkombëtar për Gjykatat Penale dhe Zyra e Prokurorit të Serbisë për Krime Lufte ende nuk kanë komentuar.
Vojsllav Sheshel më 2018 ishte dënuar me 10 vjet burgim nga Tribunali i Hagës për nxitje të persekutimit, dëbimit, zhvendosjes, zhvendosjes me forcë të kroatëve në fshatin Hërtkovci më 1992.
Më 6 maj 1992, Sheshel mbajti një fjalim në këtë vend, që sipas Mekanizmit Ndërkombëtar për Gjykatat Penale, ka thënë se ka kontribuuar në persekutimin, dëbimin dhe veprime jonjerëzore.
Sheshel është lënë i lirë në Serbi për shkak se ka vuajtur dënimin, gjatë paraburgimit nga viti 2003 deri më 2014.
Ndryshe, Mekanizmi Ndërkombëtar për Gjykatat Penale për vite me radhë i ka kërkuar Serbisë që të ekstradojë anëtarët e partisë së Sheshelit, Petar Jojiq dhe Vjerica Radeta, të cilët akuzohen për frikësim, kërcënim dhe ofrim të ryshfetit për dëshmitarët në rastin gjyqësor kundër Sheshelit.
Serbia ende refuzon që të ekstradojë ata, duke argumentuar se sipas një vendimi të Gjykatës së Lartë të Beogradit, nuk janë plotësuar kushtet për ekstradimin e këtyre personave. Kjo gjykatë, më 2016, ka thënë se nuk ka pasur baza ligjore për arrestimin dhe ekstradimin e anëtarëve të Partisë Radikale Serbe, sepse ligji vendor për bashkëpunim me gjykatën e Hagës parashikon se vetëm personat e akuzuar për krime lufte mund të ekstradohen e jo ata që akuzohen për minim të gjykatës