Kryetari i Nismës Socialdemokrate, Fatmir Limaj, ka folur pas përfundimit të takimit të liderëve të partive politike të thirrur nga kryeministri në detyrë, Albin Kurti. Limaj tha se pas tre muajsh ngërç institucional, ky takim kishte mundësi të ofronte më shumë substancë, por në fakt u shndërrua në diskutim mbi interpretimet e secilit për aktgjykimin e Gjykatës Kushtetuese.
“Pas ca muajsh, pas 3 muaj erdhëm tek një takim i tillë,” deklaroi Limaj. “Sot ky takim më tepër ka shkuar rreth qasjeve dhe këndvështrimeve të secilit se si e shohin aktgjykimin e Gjykatës Kushtetuese, e më pak është folur për atë që besoj unë është tema kryesore,” theksoi ai. Sipas Limajt, krizat e tilla nuk mund të tejkalohen pa marrëveshje të mirëfilltë politike mes partive.