Kryetari i Nismës Socialdemokrate, Fatmir Limaj, ka deklaruar se nëse partia e tij arrin të kalojë pragun zgjedhor në zgjedhjet e parakohshme më 28 dhjetor, atëherë në Parlamentin e Kosovës Nisma do të bashkohet me grupin parlamentar të Partisë Demokratike të Kosovës.
Limaj, ka konfirmuar sonte në një konferencë për media se nuk ka ndodhur bashkimi me PDK-në për zgjedhjet e 28 dhjetorit, duke i dhënë fund pritjeve dhe spekulimeve të ditëve të fundit.
Limaj tha se pavarësisht bisedimeve që janë zhvilluar deri në minutat e fundit, marrëveshja për bashkim nuk është arritur dhe se Nisma do të garojë e vetme në zgjedhje me listën prej 110 burrash dhe grash.
Ai theksoi se shumë qytetarë, bashkëpunëtorë, ish-luftëtarë dhe diaspora kanë pritur një lajm për bashkim, një lajm që, siç tha ai, “do t’i gëzonte zemrat”, por përkundër përpjekjeve, marrëveshja nuk u arrit.
“Shpresa ka nevojë për guxim. Ne jemi munduar deri në këtë sekond, bashkë me bashkëpunëtorët, t’ju japim një lajm. Fatkeqësisht, ai bashkim që e keni pritur nuk ka ndodhur. Kemi dashur të shkojmë bashkë në këtë garë, por nuk u bë,” u shpreh Limaj.
Megjithatë, ai paralajmëroi se ideja e bashkimit nuk ka përfunduar me këtë proces zgjedhor, duke thënë se rruga drejt bashkimit është e vështirë, por do të vazhdojë.
“Individi nuk e ndal bashkimin. Ai bashkim do të vijë. Ka mundur të vijë sonte… në Prishtinë nuk ndodhi. Ne do të kthehemi te baza dhe do të vazhdojmë të punojmë,” deklaroi Limaj.
Sipas Limajt, premtimi i Nismës është i qartë se nëse arrin të futet në Kuvend, partia do t’i bashkohet çdo nisme për bashkim që synon ndryshim dhe stabilitet.