Qendra telefonike për parandalimin e vetëvrasjeve ka bërë të ditur se do ta shkurtojë orarin e punës.
Përmes një njoftimi, është bërë e ditur se “Linja e Jetës” për shkak të mungesës së fondeve është detyruar ta bëjë një gjë të tillë.
Një arsye tjetër për shkurtimin e orarit, sipas tyre është edhe mungesa e vullnetarëve.
“Ju njoftojmë se nga dita e hënë (8 gusht), Linja e Jetës do të shkurtojë orarin e punës përkohësisht. Orari i ri do të jetë prej 14:00 deri në 02:00. Ky shkurtim i orarit ka qenë i detyruar për shkak të mungesës së fondeve dhe numrit të ulët të vullnetarëve”, thuhet në njoftimin e tyre.
Në njoftim thuhet se organizata “Linja e Jetës”, do të angazhohet që ky reduktim i orarit të jetë sa më afatshkurtër, në mënyrë që ta ofrojnë ndihmën e duhur te personat që kanë nevojë.
Kjo organizatë u ka bërë thirrje të gjithë atyre që kanë mundësi që të kontribuojnë financiarisht, kjo, për të pasur më të lehtë operimin e tyre.
Orari i mëhershëm ka qenë nga ora 10:00 deri në 02:00.