Aktivistë të organizatës “Liria ka Emër” kanë zhvilluar të martën një aksion simbolik para objektit të EULEX-it në Prishtinë, ku ndodhet edhe Zyra e Dhomave të Specializuara të Kosovës.
Gjatë aksionit, aktivistët kanë vendosur një pankartë të madhe me fotografitë e ish-krerëve të Ushtrisë Çlirimtare të Kosovës (UÇK), të cilët po mbahen në paraburgim në Hagë.
Në pankartë është vendosur mbishkrimi: “Në emër të popullit, shpalleni të pafajshëm”.
Përmes këtij aksioni, aktivistët kanë kërkuar që katër ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi, të shpallen të pafajshëm.
Ata kanë thënë se Kosova nuk do të heshtë përballë padrejtësive që u janë bërë ish-krerëve të UÇK-së.