Këngëtari Gjesti është liruar nga paraburgimi këtë të enjte.
Gjykata Themelore në Prishtinë ka nxjerrë sot aktvendimin për ndërprerjen e masës së paraburgimit ndaj Gjestit, mbi një javë pasi u ndalua.
Këtë për Dukagjinin e ka konfirmuar edhe Kaltrina Shala, zëdhënëse e Prokurorisë Themelore në Prishtinë.
“Lidhur me pyetjen tuaj, ju njoftojmë se i pandehuri pasi qe ka arritur marrëveshje për pranimin e fajësisë me Prokurorin e Shtetit lidhur me veprat penale “Mbajtja ne pronësi, kontroll ose posedim te paautorizuar te armeve”, “Kanosja” dhe “Asgjësim apo dëmtim i pasurisë”, ndaj te njëjtit kane pushuar arsyet ligjore për te cilën ka qene nen masën e paraburgimit. Andaj, prokurori i shtetit pranë gjykatës kompetente ka bere kërkesë për ndërprerjen e masës se paraburgimit ndaj tij”, ka thënë Shala.
Kujtojmë se më 11 mars, Prokuroria Themelore në Prishtinë pati njoftuar se këngëtari i njohur Gjesti ishte ndaluar për 48 orë, pasi dyshohet për kryerjen e disa veprave penale, përfshirë mbajtje të paautorizuar të armëve, kanosje dhe dëmtim të pasurisë.
Më pas, më 13 mars, Gjykata Themelore e Prishtinës i pati caktuar masën e paraburgimit prej një muaji.