I është vazhduar masa e paraburgimit edhe për dy muaj Milun Milenkoviqit, i njohur ndryshe si “Llune”.
Ai dyshohet për kryerje të veprave terroriste në bashkëkryerje.
Lajmin për Portalin Dukagjini e ka konfirmuar zëdhënësja në Gjykatën Themelore në Prishtinë, Mirlinda Gashi.
“Departamenti Special i Gjykatës, ka vendosur sipas kërkesës së Prokurorisë Speciale, me ç’rast ka marrë vendim që të pandehurit në fjalë, paraburgimi t’i zgjatet edhe për dy muaj të tjerë”, ka thënë Gashi.
Milun Milenkoviq, i njohur si “Llune”, është arrestuar nën dyshimin se ka kryer veprën penale “Sulmi terrorist”, që kishte ndodhur ndaj zyrave të Komisionit Komunal të zgjedhjeve – KKZ në dhjetor të vitit të kaluar.
Në të njëjtën ngjarje dyshohet se është i përfshirë edhe ish-zyrtari policor i Kosovës, Dejan Pantiq.
Po ashtu, “Llune” dyshohet edhe për veprat e tjera penale të ndërmarra ndaj ushtarëve të KFOR-it.