Sipas Ministrisë së Mbrojtjes ruse, Ukraina ka nisur një sulm me dronë në Moskë, duke detyruar që fluturimet të devijohen nga Aeroporti Ndërkombëtar Vnukovo.
Sipas raportimeve, pesë dronë thuhet se u përdorën në sulmin e së martës, i cili për synim kishte vendndodhjen në rajonin më të gjerë rreth kryeqytetit.
Ministria e Mbrojtjes tha se të gjithë dronët u rrëzuan dhe nuk pati viktima apo dëme, ndërsa në anën tjetër, Ukraina nuk ka marrë përgjegjësinë për sulmin e supozuar, raporton BBC.
Kufizimet në aeroportin Vnukovo, që është një nga tre aeroportet ndërkombëtare të Moskës, tani janë hequr. Fluturimet nga Turqia, Emiratet e Bashkuara Arabe dhe Egjipti ishin në mesin e atyre të prekurve.
Sipas Ministrisë së Mbrojtjes, katër nga dronët që fluturonin në rajonin e Moskës u rrëzuan nga sistemet e mbrojtjes ajrore. Ndërsa, e pesta u kap në mënyrë elektronike përpara se të përplasej.
Kanali “Telegram Shot”, raportoi se një nga dronët, apo pjesë prej tij, ranë mbi një ndërtesë në fshatin Krivosheino, ku si pasojë ndërtesa më pas mori flakë.
Mediat shtetërore ruse thanë se një tjetër dron u rrëzua në Kubinka, e cila është afërsisht 36 km (22 milje) nga aeroporti Vnukovo, i cili shtrihet në jugperëndim të qytetit.
Ky nuk është sulmi i parë me dron që synon Moskën. Përderisa, në maj, Ministria ruse e Mbrojtjes tha se të paktën tetë dronë shkaktuan dëme të vogla.
Kjo ishte hera e parë që qyteti ishte shënjestruar nga dronët e shumtë që nga pushtimi rus i Ukrainës nga shkurti i vitit 2022. Ndër të tjera, Kievi mohoi përgjegjësinë për sulmin.