Pesë luftëtarë të huaj që u bashkuan me Ukrainën në mbrojtjen e qytetit jugor të Mariupolit do të dalin në gjyq në të ashtuquajturën Republika Popullore e Donetskut (DPR).
Luftëtarët e huaj po akuzohen si mercenarë të huaj. Prej pesë luftëtarëve një është suedez, një kroat dhe tre britanikë.
“Gjykata e Apelit e Gjykatës së Lartë të DPR ka marrë një çështje penale kundër shtetasve të huaj Mathias Gustavsson, Vjekoslav Prebeg, John Harding, Dylan Healy, Andrew Hill, të cilët akuzohen për mercenarizëm,” ka thënë gjykata në një deklaratë të martën.
Agjencia shtetërore ruse e lajmeve ka thënë që data dhe ora për seancën dëgjimore nuk është caktuar ende, raporton CNN.
Dy britanikë të tjerë dhe një shtetas maroken u dënuan me vdekje nga një gjykatë në të ashtuquajturën DPR më 9 qershor.
Si Britania e Madhe ashtu edhe Ukraina i dënuan dënimet, duke thënë se ato ishin në kundërshtim me të drejtën ndërkombëtare.