Federata Spanjolle e Futbollit (RFEF), ka njoftuar se Luis de la Fuente është emëruar trajner i ri i Përfaqësueses së Spanjës.
Spanja, gjatë ditës së enjte, ka konfirmuar mosvazhdimin e kontratës së trajnerit, Luis Enrique, pas eliminimit në fazën e 16-të të Kupës së Botës “Katar 2022”, me penallti nga Maroku.
Megjithatë, nuk ka vonuar shumë dhe brenda një ore, drejtuesit e RFEF kanë vendosur për pasuesin e Enriques.
Bëhet fjalë për trajnerin e Spanjës U21, Luis de la Fuente, i cili do ta marrë drejtimin e kombëtares La Roja.
Është vetë faqja zyrtar e RFEF, e cila ka konfirmuar emërimin e De La Fuentes në krye të ekipit të parë.
“RFEF ka zgjedhur Luis de la Fuente si trajnerin e ri të kombëtares. Drejtori sportiv, Jose Francisco Molina, i ka transferuar një raport presidentit, Luis Rubiales, në të cilin, rekomandon zgjedhjen e trajnerit të La Roja, deri tani trajneri U-21, për të drejtuar fazën e re që nis pas Kupës së Botës në Katar”, thuhet në njoftim.
Sipas njoftimit të tyre, trajneri i ri do të debutojë në mars, në fazën kualifikuese të Gjermanisë për Euro 2024, dhe do të drejtojë dy ndeshjet e para kundër Norvegjisë dhe Skocisë.
Pasi emërimi i tij të ratifikohet nga bordi i drejtorëve, Luis de la Fuente do të prezantohet të hënën më 12 dhjetor në orën 12:30, në sallën e sportit “Luis Aragones të Ciudad del Futbol”.