“Drejtësisë nuk i kemi ikur asnjëherë sepse lufta jonë ishte luftë për liri, barazi e demokraci”.

Ky është reagimi i parë i nënkryetarit të Komunës së Skenderajt, Sami Lushtaku, pasi mbrëmë u ndal, e më pas u lirua nga policia e EULEX-it.

Lexo më shumë: Pas ndalimit nga Specialja, Sami Lushtaku lirohet nga zyrat e EULEX-it

Lushtaku ka thënë se është krenar për gjithçka çfarë ka bërë për Kosovën, liria e të cilës erdhi pas luftës dhe sakrificës së mijëra dëshmorëve e martirëve të cilët ranë gjatë luftës  çlirimtare .

“Gjatë gjithë jetës sime jam munduar të punoj me nder, duke pasur në rend të parë interesin e vendit dhe popullit tim”, ka shkruar Lushtaku.

Ai është shprehur se është mirënjohës  ndaj personave që e kanë mbështetur dhe se sipas tij, kështu do të jemi bashkë gjithmonë.

Lidhur me këtë, avokati njëherit edhe i ish-komandantit të UÇK-së, Sami Lushtaku, Artan Qerkini, ka konfirmuar se atij i është konfiskuar telefoni.

Lexo më shumë: Intervistimi i Sami Lushtakut nga Specialja – çfarë deklaroi avokati i tij?

“Ky veprim bie ndesh me ligjin. Sami Lushtaku nuk e ka statusin e të dyshuarit, prandaj atij i është cenuar privatësia pasi i është marrë telefoni”, ka thënë avokati, duke paralajmëruar ankesë në DHSK.