Zjarrfikësit në Francë po punojnë pa ndërprerje për të vënë nën kontroll zjarret që kanë përfshirë rajonin e Gironde, ndërsa autoritetet po përgatiten për një tjetër rritje të fortë të temperaturave.
“Ky zjarr është si Davidi kundër Goliathit”, deklaroi Eric Brocardi, zëdhënës i Federatës Kombëtare të Zjarrfikësve.
Ai tha se katër kolegë të tij kanë humbur jetën javët e fundit në Francë dhe se rreth 2.000 zjarrfikës janë angazhuar në Gironde për të luftuar flakët që prej ditësh po shkatërrojnë zonat mes bregdetit dhe qytetit të Bordeaux, shkruan BBC, transmeton Dukagjini.
“Kushtet e motit ishin të pafavorshme”, paralajmëroi një zyrtar lokal, ndërsa vala e katërt e të nxehtit këtë verë pritet të nisë të mërkurën, duke sjellë temperatura deri në 40°C në këtë rajon.
Sipas autoriteteve, Bordeaux, me rreth 260 mijë banorë, nuk ndodhet aktualisht nën kërcënim të drejtpërdrejtë.
Megjithatë, komandanti Rémi Lassoureille, i cili drejton operacionet e zjarrfikjes në Gironde, shprehu shqetësim për përhapjen e zjarrit në skajin perëndimor.
“Jemi të frikësuar për ndikimin që mund të ketë në Bordeaux dhe zonën metropolitane”, tha ai.
Një nga vatrat aktive të zjarrit ndodhej të hënën vetëm 15 kilometra nga periferia e Bordeaux, ku cilësia e ajrit është përkeqësuar ndjeshëm ditët e fundit.
Një pushuese nga Essex i tha BBC-së se deri të dielën në mbrëmje zona ishte zbrazur pothuajse plotësisht, ndërsa ajri ishte “shumë i tymosur” dhe hiri binte vazhdimisht. Sipas saj, shumica e banorëve dhe turistëve mbanin maska dhe era e tymit mbetej në rroba për ditë të tëra.
Ajo tregoi se një zjarrfikës u prit me duartrokitje teksa kalonte në sheshin Marché Chartrons në Bordeaux, ku disa restorante u detyruan të mbyllnin dyert për shkak të hirit në ajër.
“Qyteti ka qenë shumë i qetë”, tha Graham White, president i Komunitetit Britanik në Bordeaux. Sipas tij, dyqanet, restorantet dhe kafenetë kanë qenë pothuajse bosh, edhe pse disa persona vazhdonin të qëndronin në tarraca pavarësisht tymit.
White, i cili jeton prej vitesh në këtë zonë, tha se nuk kishte parë më parë një situatë të tillë dhe e cilësoi atë “diçka domethënëse”. Ai shtoi se disa raportime mediatike e kishin ekzagjeruar rrezikun për Bordeaux, duke e krahasuar me “Zjarrin e Madh të Londrës”, gjë që sipas tij nuk ishte e vërtetë.
Presidenti francez Emmanuel Macron, i cili vizitoi të hënën zonat e prekura nga zjarret në Gironde, deklaroi se Franca po përballet me “një zjarr krejtësisht të paprecedentë” dhe me situatën “më të vështirë që nga Lufta e Dytë Botërore”.
Ministrja e Shëndetësisë Stéphanie Rist tha se qeveria po tregohet “shumë vigjilente” për ndotjen e ajrit dhe u bëri thirrje banorëve të zonave të prekura të qëndrojnë brenda.
Të martën në mëngjes, prefekti i Gironde urdhëroi evakuimin e ri të të gjitha kampeve pranë bregdetit në Lacanau, ndërsa banorët e qytetit aty pranë u lejuan të qëndrojnë, por u paralajmëruan të jenë të gatshëm për evakuim të menjëhershëm.
Rreth 4.000 turistë të urdhëruar të largohen nga zona i shtohen më shumë se 220 mijë personave të evakuuar në Francë gjatë ditëve të fundit.
Sipas autoriteteve, deri tani janë shkatërruar rreth 240 shtëpi dhe banesa.
Deri në mesditën e së martës, zjarrfikësit po ndërhynin në disa pjesë të rajonit për të përballuar vatra që po riaktivizoheshin.
Ndërkohë, një 23-vjeçar është arrestuar nën dyshimin se ka shkaktuar një zjarr në rajonin Var. Ai përballet me deri në 15 vjet burgim.