Presidenti francez, Emmanuel Macron, deklaroi në Konferencën e Sigurisë në Mynih se Evropa duhet të rishkruajë nga themeli arkitekturën e saj të sigurisë, duke u mbështetur në interesat dhe kushtet e veta, përballë asaj që e cilësoi si agresivitet në rritje të Rusisë.
Ai theksoi se korniza aktuale e sigurisë evropiane nuk është e qëndrueshme për të ardhmen dhe se vendet evropiane duhet të përcaktojnë parametra të rinj strategjikë. Sipas Macronit, kjo mund të nënkuptojë edhe një qasje më të gjerë dhe më të koordinuar mes aleatëve evropianë në fushën e mbrojtjes bërthamore.
Presidenti francez paralajmëroi se planet për të ardhmen, të cilat përfshijnë edhe një formë bashkëjetese me Rusinë, duhet të hartohen në mënyrë të pavarur, duke marrë parasysh realitetin gjeografik dhe faktin e ekzistencës së një ushtrie ruse të fuqizuar dhe të përgatitur për konflikt.
“Ne duhet të jemi ata që negociojmë arkitekturën e re të sigurisë për Evropën për ditën që vjen, sepse gjeografia jonë nuk do të ndryshojë”, u shpreh Macron. Ai shtoi se evropianët do të vazhdojnë të jetojnë në të njëjtin kontinent me Rusinë dhe se nuk dëshiron që negociatat për këtë çështje të zhvillohen nga aktorë të tjerë, duke aluduar për Shtetet e Bashkuara dhe kontaktet e tyre me Moskën.
Macron ngriti gjithashtu mundësinë e hapjes së një “dialogu të ri strategjik” mbi armët bërthamore, duke bërë të ditur se tashmë ka nisur diskutime me kancelarin Merz dhe liderë të tjerë evropianë për mënyrën se si doktrina bërthamore franceze mund të koordinohet me disa vende kyçe në Evropë.