Presidenti i Francës, Emmanuel Macron ka telefonuar kryeministrin, Albin Kurti, të cilit ia ka përmendur rëndësinë e zbatimit të Asociacionit të komunave me shumicës serbe në kontekstin e anëtarësimit të Kosovës në Këshill të Evropës.
Kështu është njoftuar nga Presidenca franceze, ku thuhet se Macron ia ka rikujtuar Kurtit mbështetjen e palëkundur të Francës për pavarësinë dhe integrimin evropian të Kosovës.
“Ai nënvizoi përkushtimin e tij për dialogun ndërmjet Serbisë dhe Kosovës, në mbështetje të ndërmjetësimit evropian dhe bëri thirrje për zbatimin e plotë të marrëveshjeve Bruksel-Ohër. Presidenti i Republikës përshëndeti zbatimin e vendimit të Gjykatës Kushtetuese për Manastirin e Deçanit. Megjithatë, ai nënvizoi rëndësinë që Franca i kushton, edhe në kontekstin e aplikimit të Kosovës për anëtarësim në Këshillin e Evropës, progresit të shpejtë dhe të pakthyeshëm në zbatimin nga autoritetet kosovare të Asociacionit të Komunave me shumicë serbe’’, thuhet në njoftim.
Gjithashtu siç thuhet në njoftim, Macron teksa ka shprehur keqardhje për dështimin e “referendumit” për shkarkimin e kryetarëve të komunave në veri të Kosovës, ka kërkuar zgjedhje të reja atje.
“Ai ka kujtuar se organizimi i zgjedhjeve të reja sa më shpejt ka mbetur i domosdoshëm, me pjesëmarrjen e popullatës serbe”, thuhet në njoftim.