Vllaznim Surdulli, major i Policisë së Kosovës ka thënë se sfidat ndaj proceseve zgjedhore në Kosovë po bëhen gjithnjë e më komplekse, duke theksuar se elementët e luftës hibride tashmë janë të pranishëm edhe në vend.
Majori Surdulli në Forumin 2026 të organizuar nga Instituti Octopus me temë: Integriteti Zgjedhor përballë Kërcënimeve Hibride: Implikimet e Sigurisë nga Ndërhyrja e Huaj, u shpreh se arrestimi i disa zyrtarëve komunalë që kanë përdorur aspektin politiko-social për ndikim në procese, përbën një nga format e metodave hibride që synojnë destabilizimin dhe cenimin e integritetit zgjedhor, njofton Dukagjini.
Sipas Surdullit, gjatë periudhës zgjedhore Policia angazhon afër 70 për qind të personelit të saj në tri faza operative: para mbajtjes së zgjedhjeve, gjatë ditës së votimit dhe në fazën pas zgjedhore.
“Jam pjesë e proceseve zgjedhore prej një dekade. Duhet të pranohet realiteti se lufta hibride është edhe në mesin tonë. Arrestimi i disa zyrtarëve komunalë të cilët kanë përdorur aspektin politiko-social është njëra prej metodave të luftës hibride. Sfidat vetëm sa po rriten. Deri me tani jemi treguar të zot, sidoqoftë Policia e Kosovës gjatë zgjedhjeve përfshin në urdhrin e vetë afër 70 përqind të personelit, në tre faza. E para është para mbajtjes së zgjedhjeve, dita Z dhe faza pas zgjedhore, e gjitha kjo për krijimin e një klime të sigurt zgjedhore”, deklaroi Surdulli.
Ai tutje ka treguar se marrveshja ndërinstitucionale mes KQZ-së, Policisë së Kosovës, KPK-së, KPM-së, KGJK-së dhe PZAP-së e bërë disa vite më parë ajo është shumë funksionale dhe e rëndësishme edhe në ditët e sotme.