Përpos mungesës së materialit që qytetarët e Republikës së Kosovës të pajisen me pasaportë, letërnjoftim e patentë shofer, njëherit, nuk po funksionojnë as makinat elektronike për sigurimin e ekstraktit të lindjes.
Në adresën e Portalit Dukagjini ka ardhur një ankesë nga një qytetar i cili kishte paguar shumën prej 1 eurosh për sigurimin e ekstraktit të lindjes.
Nga kjo e fundit, qytetarit i kishte arritur një fletë bosh.
Ai thekson se e njëjta i kishte ndodhur edhe një të pranishmi.
Portali Dukagjini ka kontaktuar edhe me shërbimet publike të Komunës.
“Aparatet e e-kioskeve janë duke funksionuar në 3 pika. Objekti i vjetër i Komunës së Prishtinës, objekti i ri Komunës së Prishtinës , si dhe ARC-MPB Agjencioni i Regjistrimit Civil. Deri më tani nuk kemi pasur ndonjë ankesë nga qytetarët, dhe gjatë periudhës 01.01.2023 – 17.01.2023 janë lëshuar 4337 çertifikata përmes E-kiosqeve”, kanë thënë nga Komuna.