Ambasadori i ri i Shqipërisë në Kosovë, Petrit Malaj, ka thënë se nga viti 2024, Shqipëria do ta rrisë prezencën në Kosovë përmes KFOR-it.
Në një takim të mërkurën me komandantin e KFOR-it, Ozkan Ulutas, Malaj ka thënë se Shqipëria e ka Kosovën si prioritetin më të lartë. Andaj, sipas tij, kjo mbështetje do të vijojë edhe më tej.
“I shoqëruar nga Atasheu Ushtarak Kolonel Altin Kurti, zhvillova një takim miqësor me Komandantin e KFOR, Gjeneralmajor Ozkan Ulutas. Gjatë këtij takimi biseduam për situatën e sigurisë në Kosovë. Gjeneralmajor Ulutas falënderoi Shqipërinë për mbështetjen që i jep KFOR-it. I konfirmova se Shqipëria do të vazhdojë të mbështesē KFOR, pasi vendi ynë e ka Kosovën në prioritetin më të lartë. Po kështu, kjo mbështetje do të vijojë pasi në vitin 2024, Shqipëria do të rrisë prezencën e saj”, ka shkruar Malaj në Facebook.
Duke folur për dialogun, ambasadori i Shqipërisë ka thënë se është rruga e vetme për normalizimin e marrëdhënieve Kosovë – Serbi.