Ministri i Drejtësisë në Mal të Zi, Marko Kovaq, ka thënë se SHBA-të dhe Koreja e Jugut kanë kërkuar ekstradimin e ish-drejtorit ekzekutiv dhe bashkëthemeluesit të kompanisë së kriptovalutave, Terraform Labs, Do Kwon.
I arrestuar në Mal të Zi gjersa përpiqej të udhëtonte drejt Dubait, së bashku me partnerin e tij të biznesit, me mjete të falsifikuara, Kwon dyshohet të ketë humbur investimet prej më shumë se 40 miliardë dollarësh.
Gjersa SHBA-të kanë kërkuar ekstradimin e Do Kwon, Korea e Jugut ka kërkuar ekstradimin e të dyve.
SHBA-ja e akuzon atë për “orkestrim të një mashtrimi prej miliarda dollarësh të letrave me vlerë të aseteve kripto”, transmeton REL.
“Ekzistenca e urdhërarrestit ndërkombëtar për këta dy persona dhe kërkesa e paraqitur për ekstradim krijon bazën për fillimin e procedurës së ekstradimit”, tha Kovaq në një konferencë për media në Podgoricë, më 29 mars.
Ndër të tjera, ministri tha se përcaktimi i ekstradimit në shtete do të varet nga disa faktorë, si pesha e veprës penale të kryer, vendndodhjen dhe kohën kur është kryer vepra e të tjera.
Ai shtoi se SHBA-ja dhe Koreja e Jugut i kanë kërkuar gjithashtu edhe laptopët e sekuestruar nga dy të dyshuarit.
Një ditë pas arrestimit, më 24 mars, Mali i Zi i akuzoi të dy për falsifikim. Atyre iu caktua masa e paraburgimit nga autoritetet malazeze – e cila mund të zgjasë maksimum 30 ditë.
Do Kwon kërkohet nga Shtetet e Bashkuara, Koreja e Jugut dhe Singapori për atë që Komisioni amerikan i Shkëmbimit dhe Letrave me Vlerë (SEC) e quan “orkestrim të një mashtrimi prej miliarda dollarësh të letrave me vlerë të aseteve kripto”.