Zëdhënësi i Lëvizjes Vetëvendosje, Arlind Manxhuka, ka thënë se mosshkuarja në zgjedhje të parakohshme e konfirmon se opozita është kënaqur me Albin Kurti si kryeministër.
Sipas tij, 1000 ditë qeverisje nga Kurti ia kanë ndryshuar mendjen opozitës për zgjedhje, të cilët kërkuan zgjedhje që në 100 ditshin e parë të Qeverisë Kurti.
“Qysh prej 100 ditshit të parë të Qeverisë kishin kërkuar e paralajmëruar zgjedhje. Thanë nuk janë të kënaqur me qeverisjen dhe se ishin edhe ata të dëshpëruar me neve. Por, siç duket, 1000 ditët që pasuan në qeverisje ia ndryshuan mendje opozitës. Ata sot e konfirmuan që janë të kënaqur me Albin Kurtin kryeministër. Puna vazhdon, puna e mbarë Albin Kurti”, ka shkruar Manxhuka në Facebook.
Ndryshe, kryetari i PDK-së, Memli Krasniqi, ka njoftuar se se mundësia për shpërndarjen e Kuvendit dhe shpalljen e zgjedhjeve të parakohshme tashmë është ezauruar.
Krasniqi, në një konferencë për media tha se thirrja dhe propozimi i PDK-së për koordinim mes partive më të mëdha politike lidhur me këtë proces nuk e ka gjetur mbështetjen e nevojshme.
Kreu i PDK-së është shprehur i habitur me mosgatishmërinë e opozitës, siç e quajti ai, për zgjedhje të parakohshme.
“Unë mund të hamendësoj për arsyet e gatishmërisë deklarative së partisë në pushtet për të shkuar në zgjedhje të parakohshme, por vërtetë jam i habitur nga mosgatishmëria e partive opozitare për ta bërë një gjë të tillë, sepse mos shkuarja në zgjedhe efektivisht po ia zgjatë mandatin pushtetit aktual. Më lejoni të ritheksoj se Partia Demokratike e Kosovës ka qenë dhe është gjithmonë e gatshme për cilindo variant që mundëson zgjedhje të parakohshme dhe largimin e kësaj Qeverie”, është shprehur kreu i PDK-së.