Zëdhënësi i Lëvizjes Vetëvendosje, Arlind Manxhuka, ka reaguar lidhur me protestën gjithëpopullore kundër Gjykatës Speciale që pritet të mbahet sot në Prishtinë, e organizuar nga Organizata e Veteranëve të Luftës së UÇK-së.
Manxhuka ka thënë se protesta është “dhjetë vjet e vonuar”, duke theksuar se Gjykata Speciale ishte votuar në verën e vitit 2015 nga pushteti i atëhershëm.
“Është dashur që në verën e vitit 2015 të kundërshtohet pushteti i atëhershëm. Nuk mund të ndryshohet historia e Kosovës dhe lufta çlirimtare, por as historiku i themelimit të Gjykatës Speciale”, shkroi ai në Facebook.
Manxhuka po ashtu përmendi se qeveria Kurti tashmë në detyrë, në më pak se pesë vjet, ka paguar mbi 33 milionë euro për mbrojtjen e të akuzuarve në Hagë dhe shpenzimet e tjera të lidhura me procesin atje.
Ai kritikoi edhe ish-presidentin Hashim Thaçi duke përmendur intervistën e tij të fundit nga Haga, të cilën e cilësoi si “tepër të butë ndaj Gjykatës Speciale”.
“Protestat nuk mund ta zëvendësojnë apo kompenzojnë mungesën e qëndrimit të tij”, shtoi ai.
Manxhuka gjithashtu akuzoi PDK-në se ka shfrytëzuar çështjen e të akuzuarve më shumë për sulme politike ndaj qeverisë Kurti sesa për lirimin e tyre.