Kryeministri britanik, Sir Keir Starmer, ka deklaruar se marrëdhëniet mes Mbretërisë së Bashkuar dhe Kinës ndodhen në një “fazë të mirë dhe të fortë”, pas bisedimeve që i cilësoi si produktive me presidentin kinez Xi Jinping, gjatë vizitës së tij zyrtare në Pekin.

Starmer tha se gjatë takimit është shënuar përparim konkret në disa çështje kyçe, përfshirë tarifat për uiskin britanik, mundësinë e udhëtimit pa viza për qytetarët britanikë drejt Kinës, si dhe shkëmbimin e informacionit për migrimin e parregullt dhe trafikun e gomoneve.

Sipas Downing Street, dy vendet janë pajtuar të mbajnë një dialog të hapur dhe të sinqertë edhe për çështjet ku kanë mospajtime.

Presidenti Xi Jinping nga ana e tij tha se marrëdhëniet Kinë–Britani kanë kaluar “përmes kthesave dhe sfidave”, por theksoi se angazhimi mes dy vendeve është i pashmangshëm.

Gjatë vizitës, Starmer u prit me ceremoni zyrtare në Sallën e Madhe të Popullit në Pekin dhe pritet të marrë pjesë në nënshkrimin e disa marrëveshjeve me kryeministrin kinez Li Qiang.

Mes tyre, sipas raportimeve, është edhe një pakt për sigurinë kufitare, që synon ndërprerjen e furnizimit me motorë gomonesh për rrjetet e kontrabandës.

I pyetur nëse ka ngritur çështjen e aktivistit Jimmy Lai dhe trajtimin e ujgurëve, Starmer konfirmoi se këto tema janë diskutuar.

“I ngritëm këto çështje ashtu siç pritej. Angazhimi na lejon të shfrytëzojmë mundësitë, por edhe të zhvillojmë diskutime të pjekura për mospajtimet”, u shpreh ai, duke shtuar se bisedimet ishin të respektueshme.

Për kontekst, Kina është akuzuar ndërkombëtarisht për shkelje të rënda të të drejtave të njeriut ndaj popullsisë ujgure dhe grupeve të tjera myslimane në rajonin Xinjiang, raporton BBC.

Ndërkohë, sipas autoriteteve britanike, mbi 60 për qind e motorëve të gomoneve të sekuestruara nga bandat e kontrabandës vitin e kaluar janë prodhuar në Kinë.