Një marshim i serbëve në Mitrovicën e Veriut gjersa thërrasin emrin e Milun Milenkovic, i njohur me nofkën “Llune”.
Siç mëson Dukagjini, disa nga marshuesit mund të jenë pjesë e ekipit të kick-boxit, ekip trajner i së cilit është “Llune”. Nga ana tjetër, organizuesi i marshimit nuk dihet.
Asnjë pjesëtar i Listës Serbe nuk është parë në marshim.
Protestuesit janë afër urës së Ibrit, ku po qëndrojnë karabinierët dhe forcat e Policisë së Kosovës.
Ministri i Punëve të Brendshme, Xhelal Sveçla, ka njoftuar të martën se Policia e Kosovës ka arrestuar Milun Milenkovic- Llune, një nga udhëheqësit e formacionit kriminal “Mbrojtja Civile” dhe prijësin e bandave kriminale që ndër vite kanë terrorizuar qytetarët, kanë sulmuar pjesëtarët e Policisë së Kosovës dhe institucionet e Republikës së Kosovës.
Ai kishte deklaruar më vonë atë ditë se “Llune” nuk paraqiste një emër të ri për sulmet kriminale.
Sipas Sveçles, në të kaluarën, “Llune” kishte sulmuar edhe pjesëtarë të forcave ndërkombëtare.