Lotët e dhimbja për vajzën e bashkëshortin që forcat serbe ja vranë e masakruar më 15 janar të 1999, nuk i pushuan asnjëherë, Hyra Mehmetit.
Fjalët janë të pakta, derisa thotë se kryerësit e masakrës së Reçakut, vazhdojnë të jenë të lirë.
“Deri sot s’kanë bë kurgja ata po enden hala të lire ata që na i kanë mbyt, me fol s’mundem me fol sen. Burrin çiken djalin e plagostë…”, tha Hyra Mehmeti – Familjare.
Afër burrit e vajzën e Hyres, ishte familjari i tyre, Agron Mehmeti, i cili ditën e 15 janarit të atij viti e përshkruan krim kundër njerëzimit, e një traumë zor të tejkalueshme.
“Atë ditë ka ndodhur krim kundër njerëzimit i gjithë fshati ka qenë I rrethuar nga shumë forca, ushtarake policore serbe, dhe pas pas granatimit kanë hyre derë me derë e shtëpi në shtëpi, I kanë nxjerr të gjithë, njerëzit, shumë afër meje është vrarë agja im, ka qenë krim vetëm tash pas 25 viteve me mendu gjeneratat e hershme me pa film, edhe 3 a 4 ditë kanë me pa trauma e kjo që është ngjarje e vërtet’, tha Agron Mehmeti – i mbijetuar.
Të tmerrshme atë se çka ndodhi 25 vite më parë, në Reçak e përshkruan edhe i mbijetuari tjetër, Aziz Beqiri, e i cili edhe kishte varrosur viktimat.
“Tmerr më i madh nuk e di qysh me thënë, krejt i kemi bajt ne me këta shok, i kemi bartë i kemi tubu e kemi varros mas 2 muaji, tmerri më i madh u kanë kur i kanë lëshu për me i varros, u dashtë me i rreshtu si kanë qenë me familje, ka qenë tmerr i madh”, tha Azizi Beqiri- i mbijetuar.
Thirrja e të mbijetuarve e familjarëve është që institucionet të mos ndalen derisa të gjithë kryerësit e masakrës të vihen para drejtësisë, ndërkohë që thonë se dëshmitë e tyre përveç në organet vendore, janë edhe në ato ndërkombëtare.
“Unë kam dëshmuar në 2002 në tribunalin e Hagës, kundër Millosheviqit, dëshmia ime është pranuar nga gjykata por ai nuk arriti me marr dënimin e merituar, edhe pse ka qenë vetëm urdhërdhënësi dhe kryekasapi i Ballkanit, ai ka pas edhe komandë zingjirore dhe këta s’kanë marr ende dënimin e merituar”, tha Agron Mehmeti – i mbijetuar.
Ndërkohë që kompleksi memorial në Reçak, priti edhe shumë qytetarë të vendeve të tjera, tek e cilësuan si vend historik, e bënë thirrje për liderë politik.
“Ky vend është që vijnë njerëzit e vizitojnë është vend Historik. Unë përherë vijë”, tha Shefki Hajdari- Qytetar.
“Pozitë e opozitë duhet me u bashku me i lanë inatet, edhe duhet me u bashku deri te krym punën me Serbinë, mos me ngajt për parti”, Halit Hetemi – Qytetar.
Mëngjesin e 15 janarit të vitit 1999 forcat serbe vranë 45 civilë, ndërkohë që po kjo masakër alarmoi bashkësinë ndërkombëtare për të kthyer vëmendjen nga Kosova.