Mëngjesin e së premtes së 17 qershorit, Ministria e Arsimit, Shkencës, Teknologjisë dhe Inovacionit, përmes një postimi njoftuan për informacionet që kanë mbledhur në terren, ku thuhet se është vërejtur një avancim në procesin e administrimit të pjesës së dytë të Testit të Arritshmërisë.
Pjesa e dytë e Testit të Arritshmërisë u mbajt më 4 qershor, ku nxënësit iu nënshtruan pyetjeve nga lënda e Matematikës, Informatikës, Shkencave Natyrore, Fizikës dhe Kimisë.
MAShTI ka falenderuar Drejtoritë Komunale të Arsimit për bashkëpunimin gjatë prcoesit të testit.
“MAShTI, me këtë rast, falenderon Drejtoritë Komunale të Arsimit për bashkëpunimin dhe angazhimin e shtuar në eliminimin e problemeve gjatë procesit të mbajtjes së testit. Megjithatë, edhe këtë herë janë evidentuar disa probleme në disa Qendra të Testimit, si pasojë e mosrespektimit të udhëzimeve të hartuara nga MAShTI”, thuhet në njoftimin e MAShTIT.
Problemet që janë hasur në pjesën e dytë të Testit të Arritshmërisë, sipas MAShTIT janë:
- Mospërmbajtja e rregullave dhe udhëzimeve nga komisionerët dhe administruesit e Qendrave të Testimit
- Vonesa të administruesve në disa qendra të testimit, dhe përdorimi i telefonave celular nga nxënësit.
Lidhur me mosrespektimin e udhëzimeve gjatë mbajtjes së pjesës së dytë të Testit të Arritshmërisë janë marrë masat adekuate ndaj 2 administruesve, ndërsa nxënësve të cilët kanë përdorur telefonin celular dhe që janë evidentuar nga administruesit t’u llogariten vetëm pikët nga lëndët në pjesën e parë të testit, kështu ka bërë të ditur, Ministria e Arsimit, Shkencës, Teknologjisë dhe Inovacionit.