Ministria e Arsimit, Shkencës, Teknologjisë dhe Inovacionit (MASHTI), ka kundërshtuar paralajmërimin e Sindikatës së Bashkuar të Arsimit, Shkencës dhe Teknologjisë, që të premten s’do të punohet në institucionet arsimore pasi mësimdhënësit do t’i bashkohen protestës së thirrur nga Bashkimi i Sindikatave të Pavarura.
Në reagimin nga MASHTI, thuhet se humbja e mësimit është cenim i të drejtës themelore të fëmijëve për arsimim, ndërsa, ka paralajmëruar se çdo orë e humbur e mësimit do të kompensohet.
“MAShTI do të sigurohet që të kompensohet çdo orë e humbur e mësimit për fëmijët tanë, të cilët tashmë kanë humbur shumë gjatë kohës sfiduese të pandemisë”, thuhet në njoftim, transmeton Portali D.
Teksa ka thënë se ka një varg politikash me të cilat po synohet përmirësimi i kushteve të punës për mësimdhënësit, MASHTI e ka quajtur të papranueshme humbjen e orëve mësimore.
MASHTI, po ashtu, ka deklaruar se humbja e mësimit është cenim i të drejtës themelore të fëmijëve për arsimim dhe si e tillë është veprim i papranueshëm.
“Humbja e mësimit është cenim i të drejtës themelore të fëmijëve për arsimim” thuhet në reagimin zyrtar.
Në njoftimin e MASHTI-t gjithashtu thuhet se diskutimet për greva dhe protesta të mësimdhënësve nuk do të duhej të bëheshin në kohën, kur është edhe fundi i vitit shkollor.
“Prandaj, diskutimet për greva dhe protesta të mësimdhënësve nuk do të duhej të bëheshin në këtë kohë, kur është edhe fundi i vitit shkollor dhe për më tepër për faktin se në këtë periudhë po punohet me kujdes të shtuar që të kemi një Ligj sa më të mirë të pagave për rreth 80 mijë punëtorët e sektorit publik, që është edhe kërkesë e SBASHK-ut”, thuhet në njoftim.
Të gjitha institucionet arsimore në vend nuk do të punojnë të premten e 20 majit, pasi Sindikata e Bashkuar e Arsimit Shkencës dhe Teknologjisë (SBASHK), ka vendosur që t’i bashkohet protestës së thirrur nga Bashkimi i Sindikatave të Pavarura të Kosovës.
Reagimi i SBASHK-ut ishte ngritur që pas rritjes së çmimeve të disa artikujve esencialë, punëtorët në sistemin arsimor të marrin shtesa prej 100 eurosh nga muaji i ardhshëm.
