Qeveria e Mauritiusit ka vendosur masa të përkohshme kufizuese për hyrjen e shtetasve të huaj që gjatë 21 ditëve të fundit kanë vizituar, kaluar tranzit ose qëndruar në Republikën Demokratike të Kongos, Ugandë dhe Sudanin e Jugut, në përpjekje për të parandaluar përhapjen e virusit Ebola.
Vendimi u miratua në një mbledhje të kabinetit qeveritar dhe vjen në kohën kur autoritetet po shqyrtojnë edhe mundësinë e shtyrjes së samitit të biznesit SHBA-Afrikë, i paraparë të mbahet nga 26 deri më 29 korrik.
Sipas autoriteteve, shtetasit e Mauritiusit, si dhe të huajt me leje të vlefshme pune, qëndrimi, profesioni apo me viza studentore dhe biznesi, do të lejohen të hyjnë në vend, por vetëm pas përfundimit të një karantine të detyrueshme prej 21 ditësh pas mbërritjes.
Po ashtu, në të gjitha pikat kufitare do të zbatohen kontrolle të shtuara shëndetësore dhe vlerësime të rrezikut për udhëtarët që vijnë nga zonat e prekura. Personat që paraqesin simptoma të ngjashme me ato të Ebolës do të izolohen menjëherë dhe do t’i nënshtrohen ekzaminimeve mjekësore.
Ministria e Shëndetësisë dhe Mirëqenies së Mauritiusit ka njoftuar se do të intensifikojë mbikëqyrjen epidemiologjike dhe procesin e gjurmimit të kontakteve, me qëllim parandalimin e çdo rasti të mundshëm të përhapjes së virusit në vend.