Këtë të hënë në orën 10:00, në Pallatin e Rinisë dhe të Sporteve në Prishtinë në Sallën e Sporteve, do të mbahet Ceremonia e diplomimit të gjeneratës së 57-të të Policisë së Kosovës.
Në njoftimin e policisë thuhet se në ceremoni pritet të marrin pjesë personalitete të larta shtetërore dhe ndërkombëtare, ambasadorë, familjarë të zyrtarëve policorë që do të diplomojnë dhe eprorë të Policisë së Kosovës.
“Personalitetet e larta shtetërore dhe menaxhmenti i Policisë së Kosovës do t’u drejtohen të pranishmeve me nga një fjalë rasti, përderisa në këtë ceremoni do të shpërndahen edhe certifikatat për të diplomuarit”, thuhet në njoftim.
Po ashtu, policia ka njoftuar se në hyrje të rrugëve që çojnë te Stadiumi ndërpritet qarkullimi i automjeteve, si nga hyrja nga rr. “Luan Haradinaj”, po ashtu edhe nga hyrja nga ambasada Kroate, dhe nuk lejohet parkimi në atë zonë prej orës 15:00 sot deri nesër në përfundim të ceremonisë.