Një 40-vjeçar është arrestuar në Durrës pasi mbante peng 2 fëmijët e tij të mitur, 6 dhe 11 vjeç, teksa gjatë natës janë dëgjuar të shtëna me armë zjarri.
Policia është njoftuar për rastin dhe në vendngjarje kanë shkuar menjëherë forcat RENEA, të cilat i kanë bërë thirrje të dorëzohej, por ai vijoi të qëllonte nga dritarja e apartamentit.
“Rreth orës 02:20, Policia e Durrësit është njoftuar se dëgjoheshin të shtëna me armë zjarri, në ambientet e një pallati, në një apartament të lëshuar me qira, pranë zonës së quajtur ‘Shkëmbi i Kavajës’. Menjëherë, shërbimet e Policisë kanë shkuar në vendin e ngjarjes dhe nga veprimet e para rezultoi se banesa nga ku qëllohej me armë zjarri, ishte marrë me qira javore, nga shtetasi A. M., 40 vjeç, banues në Lezhë dhe se dyshohej se brenda saj ky shtetas mbante peng 2 fëmijët e tij të mitur, 6 dhe 11 vjeç. Policia e Durrësit kërkoi ndihmën e Repartit Special ‘RENEA’, pasi duhej ndërhyrje e specializuar për të mos rrezikuar jetën e fëmijëve në banesë dhe të punonjësve të Policisë. Në vendngjarje shkoi Reparti Special ‘RENEA’, i cili i bëri thirrje 40-vjeçarit që të dorëzohej, por ai vijoi të qëllonte nga dritarja e apartamentit”, thuhet në njoftimin e Policisë së shtetit.
Pas disa orësh negociata, nën masa të larta sigurie, u bë i mundur neutralizimi dhe kapja e shtetasit Aleks Marku, të cilit në banesë iu gjet një armë zjarri kallashnikov, një krehër me fishekë, si dhe 18 gëzhoja në brendësi të banesës.
Gjithashtu, Policia nxori të 2 fëmijët, të cilët janë në gjendje të mirë shëndetësore dhe po iu jepet asistencë me psikologë.
“Pas disa orësh negociata, nga Njësia e Negocimit e Repartit “RENEA” dhe me ndërhyrjen e specializuar të njësive të RENEA-s, në bashkëveprim me strukturat e DVP Durrës, nën masa të larta sigurie, u bë i mundur neutralizimi dhe kapja e shtetasit A. M., të cilit në banesë iu gjet një armë zjarri kallashnikov, një krehër me fishekë, si dhe 18 gëzhoja në brendësi të banesës. Gjithashtu, Policia nxori të 2 fëmijët, të cilët janë në gjendje të mirë shëndetësore dhe po iu jepet asistencë me psikologë”, thuhet tutje në njoftim.
40-vjeçari është shoqëruar në Polici për veprime të mëtejshme procedurale./Euronews.al