Mbretëresha Elizabeth II, të premten, mori pjesë në Royal Windsor Horse Show, për t’i parë kuajt e saj të dashur nga komoditeti i një Range Rover. Kjo ishte paraqitja e saj e parë publike pas disa javësh.
Mbretëresha ishte ulur në ulësen e pasagjerit dhe kishte folur me një grup të vogël njerëzish nga dritarja gjersa ata po ngjiteshin në terrenin e parakalimit pranë Kështjellës Windsor, ku ajo ka kaluar pjesën më të madhe të dy vjetëve të fundit. Mbretëresha dukej e relaksuar dhe buzëqeshte, ndërsa dhjetëra fotografë disa metra më tutje u përpoqën ta kapnin momentin.
Paraqitjet publike të mbretëreshës po ndiqen nga afër, ndërsa Britania po përgatitet të festojë 70-vjetorin e monarkes në fron me katër ditë festime 2-5 qershor.
Elizabeth, 96 vjeçare , ka shkurtuar orarin e saj muajt e fundit pasi u shërua nga COVID-19 dhe u përball me vështirësi të paspecifikuara për të lëvizur.
Të martën, ajo i kërkoi Princit Charles të kryesonte hapjen shtetërore të Parlamentit dhe të mbante fjalimin e Mbretëreshës, i cili parashtron programin legjislativ të qeverisë. Ngjarja është një nga paraqitjet më të rëndësishme publike të mbretëreshës, duke theksuar rolin e saj kushtetues në krye të shtetit.
Pallati Buckingham nuk shtjelloi se çfarë e shtyu mbretëreshën t’ia delegonte rolin e saj Princit Charles, por ajo në muajt e fundit ka përjetuar ato që pallati i quan “probleme episodike të lëvizshmërisë”. Elizabeth ka përdorur një kallam, gjatë disa paraqitjeve të fundit publike, ndërsa Princi Andrew e shoqëroi mbretëreshën në Westminster Abbey gjatë shërbimit përkujtimor të muajit të kaluar për bashkëshortin e saj të ndjerë, Princin Philip.
Mbretëresha e Britanisë së Madhe flet për përvojën e saj me Covid-19