Mbreti Charles III dhe Mbretëresha Camilla mbërritën të hënën në Shtëpinë e Bardhë për një vizitë shtetërore në Washington, në një kohë kur qyteti është ende i tronditur nga të shtënat e fundjavës.
Jashtë Shtëpisë së Bardhë ishin vendosur flamuj britanikë, ndërsa presidenti Donald Trump dhe Zonja e Parë Melania Trump pritën çiftin mbretëror me shtrëngime duarsh.
Ata shkëmbyen disa fjalë të shkurtra dhe pozuan për fotografi para se të hynin brenda për një çaj privat.
Më pas, Trump dhe bashkëshortja e tij i shoqëruan mbretin dhe mbretëreshën në një tur në kosheren e zgjeruar së fundmi të bletëve në oborrin jugor të Shtëpisë së Bardhë.
Në vazhdim të agjendës, Charles dhe Camilla morën pjesë në një pritje në kopsht në ambasadën britanike në Uashington, ku ishin të pranishëm edhe zyrtarë të administratës Trump, përfshirë sekretarin e Thesarit Scott Bessent, sekretarin e Tregtisë Howard Lutnick dhe administratorin e Medicare dhe Medicaid Mehmet Oz.
Në mesin e të ftuarve ishin gjithashtu kryetari i Dhomës së Përfaqësuesve Mike Johnson, ish-kryetarja Nancy Pelosi, kryetarja e Uashingtonit Muriel Bowser, si dhe figura të tjera politike si Kellyanne Conway, senatorët Ted Cruz dhe Lindsey Graham, kongresmeni Michael McCaul dhe ish-guvernatori i Virxhinias Glenn Youngkin.
Atmosfera në kopsht ishte e qetë dhe miqësore, pavarësisht tensioneve në marrëdhëniet mes dy vendeve, raporton The Guardian.
Vizita katërditore, e planifikuar për të shënuar 250-vjetorin e pavarësisë së SHBA-së, zhvillohet në një sfond të ndërlikuar diplomatik, për shkak të përçarjeve lidhur me politikën e Trump ndaj Iranit dhe një incidenti serioz sigurie gjatë darkës së Shoqatës së Korrespondentëve të Shtëpisë së Bardhë fundjavën e kaluar.
Gjatë atij eventi, një person i armatosur hapi zjarr brenda hotelit Washington Hilton, duke detyruar agjentët e Shërbimit Sekret të largonin menjëherë presidentin nga salla. Zyrtarët besojnë se objektiv i mundshëm ishin presidenti dhe anëtarë të administratës së tij, ndërsa pas incidentit u rishikuan urgjentisht masat e sigurisë para mbërritjes së mbretit.