Kryeministri i Shqipërisë, Edi Rama, ka përshëndetur vendimin e Qeverisë së Kosovës për zbatimin e vendimit të Gjykatës Kushtetuese lidhur me pronat e Manastirit të Deçanit.
Ai ka inkurajuar Kosovën që të vazhdojë të punojë me aleatët për të dëshmuar veten si një partnere e besueshme e komunitetit euroatlantik.
“Më mirë vonë se kurrë – unë e mbështes plotësisht vendimin e Qeverisë së Republikës së Kosovës për zbatimin e vendimit të Gjykatës Kushtetuese lidhur me Manastirin e Deçanit. Unë inkurajoj lidershipin e Kosovës që të vazhdojë të punojë me aleatët tanë të përbashkët kyç për të demonstruar se Republika e Kosovës është me të vërtetë një partner i besueshëm i Komunitetit Euro-Atlantik”, ka shkruar Rama në rrjetin social “X”.
I fully support the better late then ever decision of the Government of the Republic of Kosovo to implement the Constitutional Court decision concerning the Decani Monastery. I encourage Kosovo leadership to continue working with our joint key allies in demonstrating that the…
— Edi Rama (@ediramaal) March 13, 2024
Kryeministri i Kosovës, Albin Kurti, ka thënë se sot qeveria i ka kërkuar Agjencisë Kadastrale të Kosovës të zbatojë vendimin e Gjykatës Kushtetuese të Kosovës të vitit 2016 për tokën e Manastirit të Deçanit.
Në mbledhjen e qeverisë, Kurti ka thënë se ministrja e Punëve të Jashtme, Donika Gërvalla i ka dërguar notë verbale Këshillit të Evropës (KiE).
“Andaj, sot i kemi thënë Agjencisë Kadastrale të Kosovës të zbatojë vendimin e Kushtetueses. Ministrja Gërvalla i ka dërguar notë notë verbale njoftuese Këshillit të Evropës”, ka thënë Kurti.
Ai theksoi se procesi i vendimmarrjes për anëtarësimin e Kosovës do të përfundojë në maj.
“Më 22 mars është mbledhja e jashtëzakonshme e komunitetit atje, nga mesi i prillit është Asambleja Parlamentare e Këshillit të Evropës, dhe në fund të majit është Këshilli i Ministrave, në Këshillin e Evropës, që vendos për anëtarësimin tonë”, ka vijuar Kurti.
Kurti ka thënë se këtë vendim e ka marrë për ta hequr si kusht për pranimin e Kosovës në Këshill të Evropës.
Sipas tij, Qeveria ka qenë para dy opsioneve, “të plotësojë këtë kusht dhe që Kosova të pranohet në Këshill të Evropës apo të ngelë pa u anëtarësuar”.
Ndonëse vendimin Kurti vazhdon ta cilësojë të dëmshëm, ai ka theksuar se pranimi në KiE do të ishte fitore historike dhe hap gjigant për Kosovën.
Qeveria i jep dritën jeshile Agjencisë Kadastrale t’ua bartë pronat Manastirit të Deçanit