Ministri i Mbrojtjes, Armend Mehaj, përmes një postimi në Facebook ka bërë të ditur se ka takuar ambasadorin e Gjermanisë në Kosovë, Jörn Rohde. Në këtë takim kanë diskutuar rreth situatës aktuale gjeopolitike, rolin e FSK-së në këtë mes, ndihmën që mund të ofrojmë për Ukrainën, por dhe rëndësinë e ruajtjes së stabilitetit në vend, si shtet që në aspektin politik është garantues i stabilitetit në Ballkan.
“Bashkëpunimi me shtetet aleate është pjesë e rëndësishme e pandashme e rrugëtimit tonë drejt anëtarësimit në BE dhe NATO. Në këtë mes, shtet mik i yni me të cilin kemi bashkëpunim të ngushtë është Republika Federale e Gjermanisë”, ka shkruar Mehaj.
Me këtë rast, Mehaj tha se u diskutuan mundësitë e rritjes së bashkëpunimit në mes të dy vendeve, në funksion të interesave të partneritetit në fushën e sigurisë dhe mbrojtjes si dhe mundësinë e shkëmbimit të përvojave me qëllimin kryesor ruajtjen e paqes në vend, rajon dhe më gjerë.