Ministri i Mbrojtjes, Armend Mehaj ka njoftuar se Ministria e Mbrojtjes dhe Forcat e Armatosura të Shqipërisë që nga 26 Nëntori kanë organizuar javën festive me evente që janë shtrirë në qytete të ndryshme të Shqipërisë.
Mehaj ka thënë se në këtë të shtunë do të organizohet koncerti “110 vjet Forca të Armatosura – Së bashku për Paqen”, duke filluar nga ora 19:00 në Pallatin e Kongreseve në Tiranë.
“Në këtë event, Bendi ynë muzikor ushtarak do të performojë përkrah mbi 300 artistëve nga Orkestra Simfonike e FA, Kori i FA, Orkestra Frymore e FA (OFFA) dhe bandat ushtarake të vendeve të NATO nga SHBA, Britania e Madhe, Franca, Italia, Greqia, Maqedonia e Veriut, Kroacia dhe Sllovenia”, ka shkruar Mehaj.
Tutje ministri Mehaj ka theksuar se të ardhurat e realizuara nga biletat do të shkojnë në mbështetje të familjeve me fëmijë të lënduar nga lufta në Ukrainë.
Mes tjerash, Mehaj ka potencuar mbështetjen për Ukrainën, duke shtuar “së bashku me vëllezërit dhe aleatët tanë në mbështetje të Ukrainës!”.