Ministri i Mbrojtjes, Armed Mehaj, ka reaguar pas pretendimeve të Listës Serbe se Forca e Sigurisë së Kosovës, është në Zubin Potok. Ai ka thënë se të dielën e 25 shtatorit ka pasur dezinformata me qëllime të errëta për krijimin e “tensioneve dhe tendencës për dëmtimin e imazhit Republikës së Kosovës dhe të FSK-së në aspektin ndërkombëtar”.

“Ministria e Mbrojtjes dhe FSK, të gjitha aktivitetet stërvitore dhe operacionale, i realizojmë në bashkëpunim dhe bashkërendim me autoritetet vendore dhe ndërkombëtare, respektivisht KFOR-in në përputhje me mandatet tona kushtetuese dhe ligjore”, thuhet në reagimin e Mehaj-it në Facebook.

Sipas tij, qytetarët pa dallim kombësie duhet ta dinë se “Ministria e Mbrojtjes me FSK-në janë dhe do të jenë gjithmonë në shërbim të të gjithë qytetarëve të vendit pa dallim”.

Më tej Mehaj ka thënë se ska dyshim dhe është e qartë hapësira gjeografike që FSK bashkë me partnerët ndërkombëtarë mbulon, pra çdo cep të shtetit.

Në fund ai i ka ftuar të gjithë qytetarët e vendit e posaçërisht qytetarët e pjesës veriore të vendit, që të mos bien pre e dezinformatave dhe lajmeve të rrejshme të cilat lansohen me qëllime të errëta.

Lista Serbe dyshon se FSK-ja është në Veri – paralajmërojnë Kurtin se nuk do të tolerohet një sjellje e tillë