Ndryshimi i qëndrimeve të Lëvizjes Vetëvendosje dhe kryeministrit Albin Kurti, në lidhje me Asociacionin e Komunave me Shumicë Serbe, sipas kryeredaktorit të “Albanian Post”, Lirim Mehmetaj, krijon klimë edhe për mashtrime të tjera.
Mehmetaj në “Five”, ka thënë se i gjithë narracioni i LVV-së, sa ishte në opozitë ishte kundër Asociacionit, të çfarëdo lloji. Me të ardhë në pushtet sipas tij, ky qëndrim ka ndërruar.
Për këtë arsye, ai ka thënë se veprimet apo deklaratat e Kurtit në vijim, duhet të shikohen me dyshim.
Ndërrimi i qëndrimeve në mënyrë kaq “radikale”, sipas tij nuk duhet të tejkalohet lehtë, sepse “kjo krijon recetën ideale për mashtrime ideale e të përhershme dhe bankrotim të komplet mënyrës se si bëhet politikë”.
“Premtimi qeveritar ka qenë jo Asociacion, është e rëndësishme sepse kur flet qeveria se cfarë do të ndodhë, ti e matë në raport me veten. Kur e kemi parë që qëndrimi bazik opozitaer ka qenë jo Asociaicon, tash kur e kemi një qeveri që ka hequr dorë nga qëndrimi themeltar i ish-opozitarizmi, duhet të shikohet me sy dyshues ckado që thotë sot. Kur thotë Kurti, unë nuk e pranoj atë lloj Asociacioni, na duhet ta vlerësojmë me vetën e tij kur thoshte nuk do të pranoj asnjë lloj Asociacioni”, ka thënë ai.
Mehmetaj, ka thënë se ekziston një perceptim publik, i matur se shumica e qytetarëve të Kosovës, janë kundër Asociacionit.
Një arsye se pse nuk është formuar deri tash Asociacioni, është për shkak se nuk ka pasur vullnet popullor.