Kryetari i Partisë Demokratike të Kosovës (PDK), Memli Krasniqi, ka reaguar për ngjarjet e fundit që kanë ndodhur në Veri të Kosovës, pasi përfaqësuesit e Listës Serbe, në takimin me përfaqësuesit serbë të institucioneve të Kosovës, kanë vendosur për bojkotimin e institucioneve të Republikës së Kosovës.
Serbët vendosin t’i bojkotojnë institucionet e Kosovës (VIDEO)
Krasniqi ka thënë se situata gjatë ditës së shtunë në veri të vendit shënon një akt të paprecedentë, jo vetëm të dënimit të sovranitetit juridik e shtetëror të Republikës së Kosovës, por edhe cenimin e rendit publik.
“Zhvillimet e sotme në veri të vendit shënojnë një akt të paprecedentë, jo vetëm të cenimit të sovranitetit juridik e shtetëror të Republikës së Kosovës, por edhe të cenimit të rendit publik, i cili është bazë për sigurinë e jetës së të gjithë qytetarëve të asaj zone, pa dallim”, ka thënë Kransiqi.
Ai ka bërë të ditur se është jashtëzakonisht i shqetësuar me këto zhvillime.
“Jam jashtëzakonisht i shqetësuar me këto zhvillime dhe në rrethana kur nuk ka një epilog të qartë rreth tyre, është obligim i qeverisë që t’ua sqarojë qytetarëve se çka në të vërtetë është duke ndodhur atje”, ka shtuar Krasniqi.
Andaj, Krasniqi ka kërkuar nga Kryeministri i Kosovës, Albin Kurti, që t’u drejtohet qytetarëve për t’i njoftuar për seriozitetin e situatës.
“Prandaj, kërkoj nga kryeministri i Kosovës, z.Albin Kurti, që t’ju drejtohet qytetarëve për t’i njoftuar për seriozitetin e situatës dhe për hapat që do të ndërmarrin institucionet e vendit për të garantuar ruajtjen e rendit publik, jetës së qytetarëve dhe sovranitetit të vendit”, ka thënë ai.
Krasniqi ka ngritur shqetësimin e tij duke thënë se “Situata është duke ndryshuar nga ora në orë dhe rreziku i përshkallëzimit është evident. Kjo duhet të shmanget dhe qëllimi duhet të jetë ruajtja e paqes dhe sigurisë”.
Kurti: Presidenti i Serbisë ka gënjyer dhe ka zhgënjyer amerikanët e evropianët