Për angazhimin e saj të madh ndaj krizës së refugjatëve, ish-kancelarja Angela Merkel është vlerësuar me Çmimin e Paqes nga organizata kulturore e OKB-së, “UNESCO”.
“E gjithë juria u prek nga vendimi i saj i guximshëm në vitin 2015 për të pranuar më shumë se 1.2 milionë refugjatë, veçanërisht nga Siria, Iraku, Afganistani dhe Eritrea”, tha presidenti i jurisë dhe fituesi i çmimit Nobel për Paqe 2018, Denis Mukwege të martën në Paris.
“Është një mësim që ajo ia lë historisë”, ka thënë ai.
Drejtoresha e Përgjithshme e UNESCO-s, Audrey Azoulay, gjithashtu nderoi angazhimin e Merkelit.
“Paqebërja ka të bëjë gjithashtu me hapjen e dyerve për ata që vuajnë,” deklaroi ajo.
Çmimi mban emrin e ish-kreut të shtetit të Bregut të Fildishtë, Félix Houphouët-Boigny.
Pas 16 vitesh në detyrë, Merkel u largua nga posti i saj si kryetare e shtetit të Gjermanisë në vitin 2021. Kriza e refugjatëve dominoi mandatin e saj të tretë më shumë se çdo çështje tjetër.
Një valë refugjatësh u afrua në kufijtë e Evropës në vitin 2015 si rezultat i luftërave në Lindjen e Mesme, kryesisht në Siri, Afganistan dhe Irak.
Çmimi i Paqes u jepet çdo vit që nga viti 1989 njerëzve, organizatave ose institucioneve që kanë bërë përpjekje të veçanta për të promovuar, hulumtuar ose siguruar paqen.