Greva njëorëshe e mësimdhënësve në të gjithë vendin pritet të mbahet të enjten e 12 majit.
Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, ka paralajmëruar se pos grevës, më 20 maj do të ketë edhe një protestë.
Sipas SBASHK-ut, orët e humbura në grevë nuk do të zëvendësohen dhe, nëse Qeveria e Kosovës nuk reagon, atëherë nga SBASHK-u thonë se do të hyjnë në grevë të përgjithshme.
Kjo për shkak të kërkesës së tyre për 100 eurosh shtesë në pagë deri në miratimin e Ligjit të Pagave.
“Duke e parë që nuk ka pas asnjë lëvizje konkrete, asnjë takim konkret, asnjë veprim i duhur i Qeverisë, këshilli drejtues (i SBASHK-ut) vendosi që më 12 maj të jetë një grevë paralajmëruese njëorëshe në tërë sistemin arsimor. Por në këtë grevën njëorëshe kemi informacione se do të jenë edhe sektorët e tjerë dhe sindikatat që janë pjesë e BSPK-së. Ndërsa sa i takon sektorit të arsimit ne e kemi bërë edhe planin, orarin”, deklaroi Jasharaj.
Sipas Jasharajt, kjo grevë duhet të jetë një alarm, fillimisht për ministren e Arsimit, Arbërie Nagavci, e pastaj për të gjithë ekzekutivin që të reagojnë dhe të parandalojnë grevat e radhës.
“Orët që humbin në grevë nuk zëvendësohen sepse po të bëhej kështu, Qeveria do të na linte një muaj në grevë duke e ditur se ne pastaj do t’i zëvendësojmë orët dhe forca e grevës si instrument i yni do të zbehej. Ky duhet të jetë edhe një alarm shtesë për ministren Nagavci në radhë të parë si ministre e sektorit të arsimit por edhe për tërë Qeverinë Kurti, ata munden me veprime konkrete të mos na çojnë as në grevën e të enjtes e as 20 majit në protestë”, shtoi ai.
Ndryshe, më 12 prill të këtij viti, Nënkryetarja e Sindikatës së Bashkuar së Arsimit, Shkencës dhe Kulturës (SBASHK), Vjollca Shala, është shprehur e pakënaqur me vendimin e qeverisë për të ndarë një shumë prej 100 eurosh për disa kategori të shoqërisë kosovare, si ndihmesë për të përballuar krizën ekonomike në vend.
Ajo për RTV Dukagjinin, ka deklaruar se, nëse qeveria e Kosovës nuk reflekton deri më 21 prill, atëherë do të ndërmerren veprimet sindikale, duke mos përjashtuar edhe grevën e përgjithshme.
“Ne gjithëherë i lëmë hapësirë qeverisë që të reflektojë. I kemi dhënë afat që deri më 20 prill të reflektojë. Nëse nuk ka reflektim nga ana e qeverisë deri më 21 prill, atëherë do të shkohet me veprime sindikale. Mbetet që më 20 prill të vendoset nga Këshilli Drejtues i SBASHK-ut që të merret vendimi për veprimet e mëtutejshme që nuk përjashtohet edhe greva e përgjithshme”, ka thënë ajo.
Të enjten grevë njëorëshe, SBASHK-u: Po përgatitemi për grevë të përgjithshme