Drejtori i garës më i përmendur në histori të Formula 1, Michael Masi, është larguar sot zyrtarisht nga të gjitha pozitat që kishte në Federatën Internacionale të Automobilizmit.
Pasi në fillim të vitit ai ishte larguar nga pozita e drejtorit të garës – duke marrë një pozitë tjetër brenda FIA-s, ai tashmë ka vendosur që të largohet zyrtarisht.
Në njoftimin e nxjerrë thuhet që “FIA konfirmon që Michael Masi ka vendosur të largohet nga institucionet jonë dhe të rivendoset në Australi në mënyrë që të jetë më afër familjes dhe të ketë sfida të tjera në jetë”.
Michael Masi ishte drejtor i garës në sportin më të shpejtë në botë, Formula 1, për tre vite, pasi u emërua në krye të detyrës pas vdekjes së Charlie Whiting.
Deri në fund të sezonit që lamë pas, Masi ishte një ndër drejtorët e garës që nuk bëri shumë bujë – por pas garës së Abu Dhabi-t, emri i tij u bë aq i përmendur sa që në një pikë krahasohej me Hamilton dhe Verstappen.
E pikërisht vendimet e tij në garën e fundit të Abu Dhabi-t, ku Verstappen tejkaloi Hamiltonin në xhiron e fundit për të fituar titullin, e bën atë temë në F1.
Sipas shumicës, vendimet e tij ishin shumë kontroverse dhe shkatërruan rrjedhën e një super sezoni 2021 – por gjithsesi plot drejtues skuadrash kanë dal në mbrojtje të Masi-t pasi sipas tyre vendimi i tij ishte i duhur për momentin ku ndodhej gara.