Kryeministri i Maqedonisë së Veriut, Hristijan Mickoski, ka reaguar pas thirrjeve nacionaliste dhe ksenofobe që u dëgjuan gjatë ndeshjes së basketbollit mes Maqedonisë së Veriut dhe Rumanisë, e zhvilluar të shtunën në Kumanovë.
Gjatë kësaj ndeshjeje, një grup tifozësh brohoritën slogane të rënda si: “Shqiptari i mirë është shqiptar i vdekur”, “Dhoma gazi për shqiptarët” dhe “Maqedoni e pastër”, duke shkaktuar reagime të ashpra në opinion.
Edhe pse ishte i pranishëm në sallë, Mickoski tha se nuk kishte dëgjuar këto thirrje, duke i cilësuar ato si thirrje të një “grupi të vogël njerëzish”.
“Dua ta shfrytëzoj këtë rast për t’iu bashkuar dënimit të nacionalizmit dhe ksenofobisë – së pari për atë që ndodhi gjatë ndeshjes, e më pas për të dërguar një mesazh për të gjitha grupet e tifozëve: të mbështesin në mënyrë sportive, ta përkrahin ekipin e tyre dhe përfaqësuesen kombëtare të Maqedonisë,” deklaroi ai të hënën.
Në ndeshje ishin të pranishëm edhe zyrtarë të tjerë të lartë të shtetit, por reagimet ndaj gjuhës së urrejtjes u munguan në momentin e ngjarjes, duke shkaktuar shqetësim mes komunitetit shqiptar dhe më gjerë.