Pas dhjetë ditësh, Stantërgu ka gjetur qetësi, dhe aty po qëndrojnë vetëm kujdestarët.
Minatorët kanë lënë nëntokën në orët e hershme të mëngjesit pas arritjes së një marrëveshjeje, që u ndërmjetësua nga deputetë e zyrtarë të ministrive, me Bordin e përkohëshëm.
Megjithatë, greva e ndërprerë, sipas tyre, është vetëm e pezulluar dhe minatorët mund të rikthehen për të grevuar.
“Kanë ardhë këta të sindikatës ka ora 1 e natës. Kanë thënë se do ta në plotësojnë këto kushte, për sigurim shëndetësor së pari, nuk kanë dhënë datë veç shumë shpejt na kanë thënë se do rregullohet e për këto tjerat, i kanë rregullu krejt. Ishalla rregullohet për pagë e pak kushte më të mira dhe nuk na intereson kush del apo çka po bahet por që ta marrim pagën me rregull dhe t’i kemi kushtet më të mira sepse kushtet i kemi. Njëher e kemi pezulluar kështu dhe na kanë premtuar se nuk do ta dërgojnë shumë largë por ta shohim. Nëse nuk plotësohen kërkesat po do të kthehemi”, ka thënë Ismajl Cimili.
Pavarësisht kësaj marrëveshjeje të arritur, për minatorët koha e pritjes ishte një zhgënjim.
“Minatorët iu kanë besuasr deputetëve të Kuvendit të Republikës së Kosovës edhe dikujt duhet t’i besojnë. E kanë ndërpre grevën dhe të them të drejtën, e kanë pasur edhe një zhgënjim se iu kanë thanë edhe deputetëve, në njëfarë mënyre nuk i kanë prit bash mirë minatorët se kanë thënë që kjo punë do duhej kryer ditët e para dhe jo me shkatërru shnetën 10-ditë”, ka thënë Gani Osmani.
Për shkarkimin e kryeshefit ekzekutiv të “Trepçës”, Enis Abdurrahmani, që ishte ndër kërkesat e minatorëve, pritet të hapet një konkurs i ri.
Kjo, ishte mes katër kërkesave të minatorëve, përfshirë këtu pagat ndërmjet datave 6 e 30, përmirësim të kushteve të sigurisë dhe tërheqjen e vendimeve të nxjerra gjatë grevës.
Pika e fundit, ka mbetur të shqyrtohet dhe analizohet nga bordi, ndërsa minatorët, do të kthehen në punë të hënën.